Wednesday, 18. february 2009
3
18
/02
/Feb.
/2009
15:39
Ich weiss, es isch e Ewigkeit haer sit ich mi letschte itrag gschriebe ha... tuet mr leid!!
:-(
Es isch sehr viel los gse die letschte wuche (oder moenet), ich bi ganz schoen uf trab ghalte worde.
Nach em letschte itrag isch erscht mol wiehnacht gfiert worde (oh man, das isch jo wirklich scho e ewigkeit haer). S isch e schoens fescht gse mit viele viele gschaenggli (sone richtig ueberladene
wiehnachtsbaum :-P)
d taeg zwuesche wiehnacht und silvester hani mit dr kollegin verbrocht zum unseri ferie z plane. Am 31.12 simmer denn uf san francisco gfloge und haenn silvester doerte gfiirt (viiieel besser als
in daem kleine oertli do). San Francisco isch e sehr e schoeni stadt, au wenn all die huegel einem ganz schoen zum schnufe bringe koenne. Nach einere wuche simmer witer nach los angeles, wo uns die
summerlichste temperature erwartet haenn. Das het ganz schoen guet do, nach dene isigkalte temperature. Um so schlimmer aber, wo mr denn nach einer wuche wieder heime gfloge sinn... Am flughafe het
mi gaschtvater gseit, dass Los Angeles e hitzerekord ka het und Wisconsin e kaelterekord. Es isch also schlimmer ko als ich s mr vorgstellt ha. Nit uebertriebe, es het - 30 bis - 40 grad
ka... Ich glaub das isch was me e kaelteschock nennt :-( ich bi die naechste taeg nit us em huus gange. Es het denn aber uftaut und im momaent haemmer sogar nur so um die null grad, s isch grad
agnaehm :-P
Dr raescht vo mine ferie hani mit fuulaenze verbrocht :-)
Aendi januar het s zweiti semschter agfange und das haltet mi sehr beschaeftigt. Unter anderem hani Gschicht belegt, was sehr viel arbet betuetd. I ha mi au no gmolde fuer d Theaterproduktion s
Buehnebild z mole, was ganz schon viel vo minere freizyt wird in aspruch naeh.
Zudaem muessi mr jo ueberlege, was ich wott studiere wenni heime kum und ich probier in d hochschuel fuer gstaltig und kunscht inezko zum visuelle kommunikation z studiere. Fuer das muessi e
port-folio ischicke mit arbete. Au das nimmt sehr viel zyt in aspruch. Wiener sehnd, es wird mr do nit langwilig ;-)
Ich probier au nit wieder so lang z warte mit itrag z schriebe, aber bi all daem wo muess erledigt waerde, vergiss ich das ganz schnaell
hoff ihr sind mr nit boes!!
Ich hoff au, dass bi euch alles wunderbar lauft, d fasnacht stoht jo scho bald vor dr tuer (
).
viel spass und liebi Griess
Laura
von Laura
0
Tuesday, 23. december 2008
2
23
/12
/Dez.
/2008
21:11
Mini letschte Wuche haenn sich hauptsaechlich um d Schuel dreiht. Au wenn das joor fuer mi
jo eigentlich nuet zellt, moecht me si job halt raecht mache;-) Naebebi sinn no d Theateruffiehrige gse, was mi (eimol me, ich bi mr s jo fangs gwoehnt...) in totale stress versetzt haenn. S
Theater isch aber en Erfolg gse und es het viel Spass gmacht. Jetzt hani aendlich Ferie
Do isch absolut tiefe Winter.. es het schnee en masse, sodass es kei Usnahmefall me isch, dass d Schuel aentwaeder zwei Stund spoeter afot oder ganz usfallt. Es isch sogar no kaelter worde do...
aber fang mi afo dra gwoehne. Wenns minsu zaeh grad het no isch es "gar nit eso kalt huet". D Vorteil wo aber dae Winter mitsich bringt sinn Snowboard und Snowmobile fahre. Es git extra Bahne fuer
Snowmobile wo ueber s ganzi Land goehn und me ka fahre und fahre bis me bloed wird
Am Wuchenaend het mi mini Gastfamilie als Ueberraschig an e ganz e bsundere Ort empfiehrt: Ungefaehr e stund mit em Auto entfaernt gits e kleins Doerfli wo New Glarus heisst. Es heisst au
"Wisconsin's little Switzerland". Das Doerfli isch ufbaut wie ne richtigs kleins schwizer Baergdorf. Ueberall sinn Holzchalets, alles isch agschriebe in Schwizerduetsch, sogar d Strossenaeme! Mir
sinn in schwizer Souvenirlaede gange und in Laede mit schwizer Import. No hani naebe schwizer Gutzi, Brot, Gipfeli und konfi au tatsaechlich Rivella gfunde=D zwar zum dopplete priis wie in dr
schwiz, aber das isch mr s denn waert gse;-) Es wohne huet no vieli Schwizer uswanderer doert oder die naechste generatione vo uebersiedler. Es isch wirklich e glungeni ueberraschig gse und sau
glatt zum das in Amerika aztraeffe!
Ich wuensch euch allne ganz schoeni Wiehnacht und e guete Rutsch ins neui Joor!
von Laura
0
Friday, 5. december 2008
5
05
/12
/Dez.
/2008
18:34
... d Fortsetzig vom andere Itrag! D wuche druf nach Chicago isch jo denn Thanksgiving
gfiert worde. Au oepis ganz neus fuer mi. Am Morge isch die ganzi Familie zaemme ko und mir haenn gaesse so zimmlig dr ganzi dag:-P ich ha au no nie soooo viel Aesse uf eimol gseh:-P ich wuerd
euch sehr gaern bilder zeige, aber so ne dumme goof vo dr Familie het sich mini Kamera gschnappt und, froget mi nit wie, alli bilder uf dr kamera gloescht *aaarrrrrr*
naja, s git schlimmers (wenn i d bilder vo Chicago nonig uf em computer ka haet zum bispiel...). uf jede Fall isch das e grosses Fescht gse. Am naechste Tag simmer denn, ei mol me, go shoppe:-p
das isch aber nit e normale shopping dag gse, in Amerika heisst er "Black Friday". Dr Dag nach Thanksgiving isch in allne Laede radikalusverkauf. Daem entspraechend sinn au vieli Luet uf de Bei
gse zum ihri letschte Wiehnachtsikaeuf z erledige. Und es wirklich unglaublich, wie billig me teilwies d kleider bekunnt, wo vor e paar wuche eifach no kli z tuer gse sinn zum kaufe!
Sunscht isch do vo dr Vorwiehnachtszyt nit viel z gspuehre. So oepis wie Advaent oder Niggi-naeggi gits nit:-( Wenigstens kani mandarinli aesse und aerdnuessli knabbere:-P
Anderi Wiehnachtsstimmig bekumi druch s Theaterstueck "A Christmas Carol", wo ni die ganze letschte Wuche mit Probe beschaeftig gse bi und huet z obe d Premiere isch=D
Und s Waetter losst au nit dra zwiefle, dass dr Winter ibroche isch... Es isch so unglaublich kalt, dass me sich s nit ka vorstelle... Am morge hets als -10 grad und geschter hani die
freeeuudigi nochricht beko, dass es naechschti wuche, waehrend em dag soett -20 grad waerde ("can someone come and heeeeeeeeelp me???") ich weiss nit, wie ich das soell ueberlaebe
*brrrrrrrrrrrrrrr*
Geschter hets in dr Schuel e Karaokenight gaeh, das isch e gaudi gse (jop, sogar ich ha oepis gsunge, aber nur in ere gruppe vo 6 luet:-P)
Die naechste Daeg waerde voll si mit Theater und mit schuuueeelkraaam:-( Ha leider wirklich no e huffe z due zum alli faecher abzschliessee...menno. Drfuer freui mi um so me uf d Wiehnachtsferie,
do mi Wintertrip langsam gstalt animmt: Fuer zwei Wuche wirdi uf San Francisco und Los Angeles go. Es isch leider nonig alles fertig plant, aber ich glaub es soett klappe:-P hoffi jedefalls.
Aendi januar fot denn s zweiti semeschter a, aber ich maeld mi ganz bestimmt vorhaer nomol!
Wuensch euch allne e schoeni Advaentszyt!!
liebs Griessli
Laura
von Laura
1
Friday, 5. december 2008
5
05
/12
/Dez.
/2008
17:54
Am 21. Novaember simmer am Fritig, nachdaem die letschte mit ihrne Faecher fertig gse sinn,
mit saechs Autos nach Chicago gfahre. D Fahrt doert abe goht ungefaehr 3 - 4 stund, aber mit viel Musik und kli bloed due isch das im nu ume gse;-) Es isch spote Obe gse bis mr doerte gse sinn,
drum haenn mr eigentlich nuet me gmacht, als d Zimme bezoge... und das sinn sehr chici zimmer gse!! S ganzi hotel isch eigentlich sehr edel gse. Dr einzig nochteil isch, dass es nit im Zentrum
glaege isch und mit daem sinn au alli nit so guete Sache vo daem Weekend verbunde gse: die oeffentliche Transportmittel sinn e katastrophe in Chicago, me daenggts nit von ere sone Stadt, isch aber
so:-( trotzdaem haetts mit dr Bahn eigentlich nur e halb stund duurt bis ins Stadtzentrum, aber grad an daem weekend haenn si e problem mit de gleis oder so ka. S het is einehalb stund brucht zum
jewiels in s zentrum z go und wieder hei:-( viel zyt isch verlore gange und das het maengisch kli an de naerve und an dr guete Lune grisse. Mir haenn aber glich viel Spass ka. am Samschtig morge
simmer als erschts in e grossi Outlet-Mall gange go shoppe. Das isch wirkligg cool gse, well zum erschte mol hani koenne e Fuess in Laede wie Calvin Klein und Tommy Hilfiger mache und nit miesse
daengge, ich ka s jo sowieso nit zahle. Mir haenn alli sehr vieli schnaeppli koenne mache;-)
Am nomidag simmer denn nach "Chinatown" gange. Das isch e ganz e anders Viertel vo dr Stadt und me daenggt gar nuemm, dass me in Amerika isch... Es isch au ganz und gar nit dr Ort, wo ich mi ellei
wott ufhalte, aber mit dene vielne Asiate in dr Gruppe hani do keini Bedaengge ka;-) mir sinn e chinesischs Restaurant gange und das Aesse isch super gse (nit so amerikanisierts chinesischs aesse,
richtig chinesisch!). Mir sinn no kli durch d Strosse gschlaenderet und e paar haenn welle in e chinesische Supermarkt zum Aesse fuer deheime z kaufe. Das isch au oepis neus gse fuer mi: Aquarie
sinn doert inne mit verschiedene Fisch, de suechsch dr eine us und denn wird aer ganz fruesch zuebereitet *brrrr* und im ene andere Glaskaschte sinn Krote ufenanderbiege gse, so dass die unterschte
wohrschins scho verstickt sinn:-( Nachdaem Ablick bini me als parat gse zum das Quartier z verlo und mir sinn ins Zentrum nach "Downtown" gange. D Stadt seht wunderschoen us waehrend dr
Wiehnachtszyt (oder jo, VORwiehnachtszyt), well alles Beluechtet und mit liechtli behaenge isch! Mir haenn eigentlich an daem obe nuet meh gmacht, als kli umegloffe und gluegt (isch maengisch au
sehr schoen). E kleine Abstaecher in d shopping mall und in "Macy's" het denn aber glich no miesse si:-P
Sicherheitshalber simmer denn frieh gnueg uf e Heiwaeg gange, dass mr au sicher no Verbindige bis zum hotel haenn und das isch e gueti idee gse: S het irgendwo e notfall gae, dass sie uns us dr
Bahn haenn miesse usebuxiere und in Shuttlebus verfrachte... bis mr letschtlich im hotel gse sinn, sinn fascht 2.5 stund vergange... jop, Transportmittel in Chicago? pfff...
Am Sunntig simmer denn diraekt nach "Downtown" gange und haenn mehrheitlich eifach nur d Stadt agluegt. Zerscht kli durch d Strosse gloffe, denn simmer in Millenium Park gange und nachdaem, haemmer welle zum "Navy Pier" go... Mir haenn aber kli
komplikatione mit em Waeg doert ane ka und haenn daenggt, mir koennte doch dr Chauffeur von ere Limousine, wo grad am Strosserand parkt ka het, froge. S isch glaub e Italiener gse, wo im
luschtigste akzaent und voll enthusiastisch probiert het dr waeg z erklaere. Well mir alli mit eme grosse Frogezeiche dogstande sinn het aer is kurzerhand e gratisfahrt doert ane abote:-) do
haemmer also nit koenne nei sage:-P Doert ako, simmer zerscht in e Restaurant oepis go aesse und haenn die raeschtlichi zyt verbrocht zum in Souvenierlaede kli z schneuke und s schoeni Waetter z
gniesse. Am spoetere nomidag haemmer is denn wieder uf e heiwaeg gmacht. Ich ha zwar an daem wuchenaend "nur" d strosse vo dr Stadt gseh, aber das het mi sehr beidruckt. Do s jo wirkligg nur 3 - 4
stund goht zum abefahre, wirdi wohrschins friehner oder spoeter nomol go und denn moechti gaern kli musee und aehnlichi sache go aluege;-)
Ich ha bitz lang uf mi warte lo, zum vo daem usflug z verzelle, aber ich ha im momaent so viel z due. D "Finals" stoehn vor dr tuere, Wiehnacht losst au nit uf sich warte und ich bi au no voll mit
de theaterprobe beschaeftigt.
Damit dae einti Itrag nit all zu lang wird, schriebi eifach no e zweite...:-P
von Laura
0
Tuesday, 18. november 2008
2
18
/11
/Nov.
/2008
16:20
Salut!!
S isch jo nonig lang haer sit mim letschte Bricht, vo daem haer gits au nit all zu viel neus;-)
Am Fritigobe simmer go Bowle, das isch so zimmlig die einzigi "usgangsmoeglichkeit" wo s do git.
Es isch no ganz glatt gse, well dr Saal mit neonliecht usgschtattet isch und am spoetere Obe stelle sie als s Liecht ab und denn luechtet alles:-P Me merkt aber stark, dass es die einzig
usgangsmoeglichkeit isch. Uf dr einte Site, well alli Luet s bowle toedlich aernst naemme, ich glaub es het sich mittlerwile e art konkurraenzkampf entwicklet. Uf dr andere Site wird au drunke
bis gschleglet wird... isch nit so dr hammer. Dr Raescht vom Wuchenaend hani mit Film luege verbrocht, unter anderem simmer ins Kino go Saw 5 luege *uuuurg* ^^
Mittlerwiele stoht au mi Stundeplan fuer s naechsti Semster. Ich glaub, ich wird e bitz me z due ha, als bishaer... moeglicherwies dueni au no ein zwei faecher waechsle.
Usserhalb vo dr Schuel laufe im momaent Theaterprobe uf Hochtoure. Afang Dezaember wird im Stadttheater (...eehm "stadttheater" jooo...) s Wiehnachststueck "A Christmas Carol" ufgfiehrt. ich
ha zwar nur e kleini Minirolle, aber immerhin, es isch luschtig:-)
Ich ha e paar wenigi Foeteli ufeglade, fuer die wo s interessiert. Ich wird zuekuenftig me ufelade, au parallel zu mine Itraeg, dass ihr e Bild vo mim Gefasel koennet mache;-) Ich bi bishaer nur
kli z fuul gse drzue *huestel*. Es isch halt e bitz komplizierter, wenn me dr ganz dag in dr schuel isch und deheime kei Highspeed, dass de fascht ischlofsch vor em computer... Aber i ha mi jetzt
arrangiert;-)
Das waers scho gsi, ich maeld mi bald wieder!
von Laura
0
